1 كيفاش اكتشفت اختلافك عن الاخرين؟
كتاشفت راسي مختلف من صغر واخا معارفش كيفاش نسمي راسي او شنو لحالة لي انا فيها يعني شنو سميتها طبيا .
من صغري كنشوف راسي مغاير على الاخرين بمعنى طريقة لعبي كانت مع الدراري ومكانش عزيز عليا لعب لبنات ،الا ديك لعبة فاش كلعبو عريس وعروسة اما الالعاب لوخرا اغلبية مع دراري لبي طرومبيا لكرة لي هي اعز لعبة عندي بوليس وشفار ،مهم هذ الالعاب واخا كانكل قتلة دلعصا بمعنى اخرى كنكول قتلة الكلاب ونحلف لواليدة وخوتي لكبار منعاود لعب وكي نخرج نعاود عوتاني، واخا بعض لمرات كنبغي نبزز على راسي نلعب مع البنات و والو مكنلقاش راحتي.و هدشي كنقول راه انا صغير يعني ستة سنين سبعة ثمنية ايام دراسة الابتدائية يعني هدشي لا علاقة له كيف كيفكرو ناس كيقولو بلي اه عشت بين عائلة كلها دراري عليها انا هكا ولا ا مالقيتش تربية لي خاصني لا هدشي اقسم انه لا علاقة
حيث حنا عائلة لي محافضة وعندي جوج خوتات وثلاثا لخوت وعلاقتي ماشي وطيدة بهم يعني نقولو اني كنعمر مع خوتي دراري عليها انا هكا او شيء من هذا القبيل بالعكس تماما.
راه كنت كلبس حوايج بنات بزز مني وكنبقى نبكي حتى نعيا وكنت كلبس فولار غصبا عني وبزز مني هدشي فصغري لي لا علاقة له بميول او هوية او اي حاجة كتخلي شخص يفكر تفكير خايب حيث فمرحلة الصغر مكنعرف لا شنو هو ميول او هوية او جنس او اي حاجة
كنت كنعرف انني انا ماشي كيف كيشوفوني مالين دار او جيران هما الى كيشوفوني بنت كلعب مع دراري انا كنشوف راسي دري كيلعب مع صحابو .
2 -شنو هي طرق باش تقبلتي هاد الاختلاف؟
طرق باش تقبلت هد الاختلاف او نقولو كيفاش تقبلت راسي اني ترانسجندر على الاقل هد المصطلح الطبي خلاني نعرف راسي شكون انا حيث فسن 14و 15 تعقدت من نفسي كاره راسي لدرجة متصورش، حيث فهاد المرحلة عرفت ان كاين الميول المغاير لي كيكون انسان يا مثلي او مثلية او مزدوج الميول ولكن الغريب فالامر فاش بحث وقلبت لقيت بلي هد ناس مرتاحين فداتهم وكيبغيو جسمهم وذواتهم، وانا عكس الامر ومتقبلتش الامر اني نكون مثلية قلت انا ماشي مثلية انا انا راه كنحس براسي شخص محبوس ومكنتش نعرف مصطلح الطبي لي كيطلق على العابرين بحالي
كنت كندخل يوتوب وكنكتب جسد مغاير ،امراءة في جسد ليس لها ،رجل محبوس في جسد انثى ،مصطلحات بزاف كنت كنكتبهم، روح تائهة في جسد ليس لها ،
هدشي كامل باش نقدر نعرف براسي ونقدر نقول انا هاشنوووو انا ماشي مثلية كيف كتقولو او كيف كتقول نظرة لكم ليا حيث كلبس لبس مختلف .
تعقدت ونعزلت وسقطت ف ثالث اعدادي وهملت راسي بزاف لدرجة وليت غير فالدار وبقيت مع النت و العالم الافتراضي هو الواقع ديالي حيث قلت انا انسان مصاب بلعنة وكنت كنقول انا بوحدي يمكن لي داير هكا فالدنيا
وبقيت كنقلب حتى لقيت فيوتوب ترانسجندر وبحث على شنو هو معنى مصطلح وعرفت بلي انا عابرجندري
3-شاركت فحملة الحب ماشي جريمة علاش ؟
سؤال انا لي خاص نطرحو علاش كاع ناس مشاركوش
ماشي علاش انا شاركت او علاش نتي وهو شاركو حيث جواب باين
شاركت كما شاركو بزاف ناس على حاجة وحدة هي ان الحب ضروري فحياتنا باش الانسانية تبقى قلوب ناس الحب عمرو كان جريمة
لا يعقل اننا جرمو واحد الاحساس لي عاشو به ناس قرون وقرون سنين عديدة ونجرموه حنا
كفما بغا يكون ومع من ما بغا يكون
يكفي يكون حبي جوهري حب نقي يعاش وكتحسو به فحياتنا ونحسو به فقلوبنا
كما كنعيشو الحب مع واليدنيا ومع الله راه من حق الانسان يعيش الحب مع الطرف الذي اختاره قلبه مادم الانسان عاقل وفسن قانوني انه يختار شريك او شريكة حياتو فلا حق لاي كان ان يجرمه
والحب فوق كل قانون
ونهار يجرمو الحب ويتعاقب الانسان حيث كيبغي مانلوموش نفسنا فاش كنشوفو ظواهر لي هي فالاصل خاصها تكون جريمة كالاغتصابات والاختطافات والقتل
حيث الحب والمودة هما اساس الانسانية وهما لي كيخليو انسان يكون انسانا.
4-شنو أكثر حاجة كتشكل لك عائق فالاندماج مع المجتمع؟
هو الحكم المسبق الناس ليا
نظرة المجتمع ليا
حكرة ديال الناس ليا
بزاف حوايج يعني كولشي ولا بمظاهر
شوفتهم لي كيخليوك تكره راسك واخا نتا معندك حتى دنبك والو واخا انت مكرهتي تغوت فكل نظرة شخص لك كيشوفك بإحتقار وتقوليه مكرهتتتتش نكوووون بحااال مكرهتتتتش كون الله خلقني كما خلقك كامل مكمول الهيئة والجندر والروح مكرهتتش كون مكنتش هكا مضطرب بين اني نعيش كما فالحالة المدنية باش نرضي ناس ونقتل راسي وبين نعيش مع نفسي من انا ومن اكون بتمام والكمال .
بزاف حوايج هما عائق بحال اسمي ، الوالدة ، البزازل، و عدم تقبل المحيط ليا.
5-شنو الخطوات لي ناوي تخدم عليهم باش تفرض نفسك ك ترانس مان؟
الخطوات
نكدب عليك لا ارى خطوات وانا فبلاد لا تعترف بيا
لا خطوات لي فبلاد ناسها كيشوفوني وكيحللو فيا القتل فبلاد خايف فكل منخرج نتقتل رغم ان الله قال من قتل نفس بغير حق كانما قتل الناس جميعا
خطوات لي فالاصل لو عندي ماديا كنت غادي ندير خطوات ونتقاتل ونفرض راسي ديك ساعة يعني ندير عمليات تصحيح لي خاصني . ندير دعوى تغيير الاسم اولا
6-كيفاش كتعيش الحب ؟
ههههه كنعيشو معك فهاد اللحظة كنعيش معك الحب كصديقة ا لي متقبلاني كما انا وكتشوفني راجل جالس قدامها روحا قبل ان يكون شكلا .
كنعيش الحب مع صحابي لي مكانوش عارفني انا ترانسمان وبعد مدة ديال سنين الصداقة قلتها لهم وتقبلو الامر وحبوني حيث حبو الشخص لي انا عليه
كنعيش الحب مع كاع ناس كما بغاو يكونو
اما عن حب الشخص لي فالقلب ف نقولك
وترانسجندر هو شخص عادي كأيها الناس بني ادم وماشي مخلوق غريب ماوقع له يقدر يوقع لاي شخص
من الناحية الطبية ،الطب اكد ان مضطرب الهوية الجندرية ليس مرض نفسي من بعد دراسات كثيرة وبحث كثير وكبير .
والله سبحانه قال اقراء بسم ربك يعني كيحث الانسان على العلم والاجتهاد فالبحث ،حيث كون ماشي الطب ودرسات العلماء مكناش لقاو دواء لسرطان مكانش يتلقا دوار لكونسير دواء لسخانة رواح …..وعداد من الامراض لي كيستدعي بعض الاحيان اجراء العمليات لها باش انسان يرجع صحيح فصيح .
7-ممكن الا لقيتي إمكانيات باش دير عملية إزالة الرحم و الثديين ديرها؟
طبعا نديرها و بدون تردد .
